Milli Məclisin Aqrar siyasət komitəsinin sədri Eldar İbrahimov APA-ya açıqlamasında Azərbaycanda “reket” jurnalistikasının mövcudluğunu mənfi hal kimi qiymətləndirib.

Millət vəkili indiyə kimi dəfələrlə ona belə “mətbuat orqanları”nın əməkdaşları tərəfindən müraciət edildiyini, lakin onların heç biri ilə görüşmədiyini deyib:

“Az qala adama dilənçi kimi yalvarırlar. Açıq şəkildə zəng edib deyirlər ki, vəziyyətimiz ağırdır, pul istəyirik. Açığı heç onların adları da yadımda qalmayıb. Yoxsa böyük məmnuniyyətlə onların adını açıqlayardım. Belələri ancaq maddi maraq xətrinə işləyirlər. Qəribədir ki, onlarda qorxu hissi də yoxdur. Belə düşünmək olar ki, onlar kimlərəsə arxayındırlar. Ona görə də, Mətbuat Şurasının “reket” mətbuatın ifşa olunması istiqamətində apardığı işi dəstəkləyirəm. Hesab edirəm ki, bu cür üzdəniraq jurnalistlərin kökü kəsilməlidir”.

E. İbrahimov Azərbaycanda həddən artıq ziyalı, istedadlı və təmənnasız jurnalistikanın da mövcud olduğunu deyib: “Elə jurnalistlər var ki, uzun illərdir onlara müsahibəni telefonla verirəm. Təsəvvür edin ki, neçə ildir müsahibə verdiyim jurnalistləri tanımıram. Hətta onlarla görüşmək istəsəm belə razılıq vermirlər. Adam belə jurnalistləri görəndə fəxr eləyir” .

Milli Məclisin deputatı İmamverdi İsmayılov Azərbaycan Mətbuat Şurasının bu bəyanatını jurnalistika ilə bağlı olan bir adam dəstəklədiyini deyib. Onun sözlərinə görə, jurnalistika müqəddəs bir missiyanın daşıyıcısıdır: “Jurnalist cəmiyyətin mənəvi təbibidir, loğmanıdır. İndi ara-sıra jurnalist sözünün qarşısında reket təyinini görmək nə qədər ağırdır! Azərbaycan jurnalistikası bu ağrı-acıdan, onun saflığına xələl gətirən ləkələrdən mümkün qədər tez qurtulmalıdır və bu prosesin artıq başlanmasına çox sevinirik. Bu xoşagəlməz meylin, əslində, jurnalistikaya ciddi bir aidiyyəti yoxdur. Belə qəzetlərin mövcudluğu mətbu fəaliyyətin təməl prinsipləri ilə bir araya sığmır. Hər bir mətbuat orqanının başlıca məramı kütləvi oxucu auditoriyası toplamaq və öz mövcudluğunu oxucularının maddi dəstəyi ilə qoruyub saxlamaqdan ibarətdir. Aztirajlı, bəlli təmayüllü qəzetlərin isə belə bir oxucu auditoriyası yoxdur. Onlar bir qayda olaraq müəyyən neqativ məqsədləri yerinə yetirən şəxslər tərəfindən köməkçi vasitə kimi yaradılır.

Əlbəttə, qəzet adına belə biabırçılıqları ərsəyə gətirən adamlar məkrli niyyəti pərdələmək üçün guya bu qəzetlərin əsas məqsədinin məmurların fəaliyyətindəki konkret nöqsan və çatışmazlıqları hədəfə götürməkdən, hüquqları pozulan ayrı-ayrı şəxslərin müdafiəsinin təşkilindən ibarət olduğunu da iddia edə bilərlər. Amma bunu Konstitusiyanın verdiyi imkanlardan faydalanaraq, müvafiq dövlət orqanlarına müraciət ünvanlamaqla, yaxud məhkəmələrin köməyi ilə etmək olmazmı?! Bu halda fərqli adlar altında onlarla qəzet açıb sözün ismətinə xələl gətirməyə nə lüzum var?! Mənim fikrimcə, mətbuatdan çirkin məqsədlərlə istifadə bir əxlaq problemidir və bu cür ictimai əxlaqsızlığa qarşı bütün cəmiyyət mübarizə aparmalıdır. Biz belə əxlaqın sahibləri ilə ictimai yerlərdə, anaların, bacıların yanında söyüş söyən, tərbiyəsizlik edən kəslərlə davrandığımız kimi davranmalıyıq. Ona görə də bu sahədə vəziyyətin nizama salınması indi dövlətdən daha çox cəmiyyətin vəzifəsidir. Cəmiyyətdə mətbuat orqanlarının fəaliyyəti ilə bağlı maarifçilik səviyyəsi yüksəlməlidir. Biz klassik jurnalistika ənənələrinə sadiq qalan, ictimai-siyasi fikrə müəyyən təsiri olan normal jurnalistika ilə reketçi zümrəni bir-birindən fərqləndirməyi bacarmalıyıq. Xüsusilə dövlət orqanları, məmurlar kütləvi informasiya vasitələri ilə ünsiyyətdə bu amili nəzərə almalıdırlar. Əgər belə olarsa, onda Azərbaycan Mətbuat Şurasının reket qəzetlərə qarşı həyata keçirdiyi tədbirlər də yüksək səmərə verəcək. Mətbuat Şurası ictimai bir qurumdur və indiki statusunda bu qurumun əsas təsir mexanizmi ictimai qınaqdır. Bu qınağın təsir gücünün formalaşmasında fərd olaraq hər birimizin iştirakımıza ehtiyac var”.

İ. İsmayılov, həmçinin Mətbuat Şurasının problemin həllinə təsir imkanlarının artırılması üçün Şuraya əlavə səlahiyyətlərin verilməsini də məqsədəuyğun hesab edib: “Son illər dövlətin bu sahədə gördüyü işlər təqdirəlayiqdir. Xüsusilə Mətbuata Dəstək Fondunun yaradılmasını, əxlaqsız jurnalistikanın Fondun həyata keçirdiyi layihələrə yol tapa bilməməsini alqışlayıram. Bütün bunlar əsrlər boyu Azərbaycan mətbuatında mövcud olmuş sağlam ənənələrin yenidən bərpası və inkişaf etdirilməsi, Sözümüzün pisliklərdən təmizlənməsi üçün çox faydalıdır. Mətbuat Şurasının bəyanatında da qeyd edildiyi kimi, bəzi «reket nəşr»lərin arxasında gizli havadarların dayanması, onların maliyyələşdirilərək məkrli sifarişlərin icrasına cəlb edilməsi məndə böyük təəssüf hissi doğurur. Bunu yolverilməz sayıram. İndi elə bir zamandır ki, cidanı çuvalda gizlətmək olmaz. Ona görə də heç kim qəzet səhifəsi arxasında pərdələnib bədnam əməllərlə məşğul olmağı özünə rəva görməsin. Allah insanları bir-birinə həyan olmaq, könül sevindirmək üçün yaradıb. Qəzetlərdə dərc etdirilən məqsədli dezinformasiyalar isə ürəklərə şübhə toxumu səpir, insanlar arasında dostluq münasibətlərinə xələl gətirir, könül sındırır. Əgər bir könül almağı bacarmırıqsa, min könülü niyə bərbad edirik?!”

Milli Məclisin üzvü Məlahət İbrahimqızı da APA-ya açıqlamasında məsələyə münasibət bildirib. Onun sözlərinə görə, Mətbuat Şurasının son illər apardığı bu mübarizə təqdirə layiqdir. M. İbrahimqızı şuranın “reket” jurnalistikaya qarşı apardığı mübarizəni daha da intensivləşdirilməsini istəyib: “Mən bir neçə dəfə Mətbuat Şurasının açıqladığı siyahı ilə tanış olmuşam. Jurnalistika bizim gözümüzdür. Açığı, mətbuata bu reket sözü yaraşmır. Adam heç dilinə gətirmək istəmir belə ifadəni. Hesab edirəm ki, Mətbuat Şurası “reket” mətbuatın arxasında dayanan məmurların adlarını açıqlamalıdır. Onlar belə “qəzet”lərin adlarını açıqladığı kimi, onları himayə edən şəxslərin də adlarını çəkinmədən deməlidir. Qoy hamı həqiqəti bilsin. Əgər belə olacaqsa, problem də həll ediləcək”.

M. İbrahimqızı deyib ki, Azərbaycanda heç bir peşəkar jurnalistin “reket”çiliklə məşğul olmasına inanmır: “Belələri jurnalistikaya təsadüfən gələn adamlardır. Biz hamımız birləşib bu istiqamətdə mübarizə aparmalıyıq” .

Milli Məclisin (MM) İnsan hüquqları komitəsinin bugünkü iclasında İnsan hüquqları üzrə Müvəkkilin (Ombudsman) fəaliyyəti tənqid olunub.

APA-nın xəbərinə görə, iclasda Azərbaycan Ombudsmanının seçilməsi üçün MM-ə təqdim olunan namizədlər haqqında məlumat verilib, onlar haqqında fikirlər səsləndirilib.

Komitə üzvü İqbal Ağazadə təqdim olunan siyahıda adı olan hazırkı Ombudsman Elmira Süleymanovanın fəaliyyətindən narazı olduğunu, səsvermə zamanı onun namizədliyinin əleyhinə çıxacağını deyib.

Komitə üzvü Arzu Səmədbəyli isə təqdim edilən hər üç namizədin düzgün seçim olmadığını bildirib. Onun sözlərinə görə, daha uğurlu namizədlər təqdim oluna bilərdi.

Komitə üzvü Fuad Muradov namizədlərin hər üçünün haqqında müsbət fikir səsləndirsə də, ümumiyyətlə Ombudsman Aparatından gənclərin işləməsinə üstünlük verilməsini məqsədəuyğun hesab edib: “Gənclərə kömək edilməlidir. Mən demirəm ki, yaşlı adamlar işləməsinlər, ancaq bu gün daha çox gəncliyə meydan verilməli, onların aktiv fəaliyyətinə şərait yaradılmalıdır. Hər kim seçilsə, Azərbaycan həqiqətlərini dünyaya çatdırmaq uğrunda aktiv işləməlidir”.

Komitə üzvü Cavanşir Paşazadə isə Elmira Süleymanovanın fəaliyyətini təqdir etdiyini, səsvermə zamanı onu dəstəkləyəcəyini bildirib.

Komitənin sədr müavini Yevda Abramov hazırkı Ombudsman Elmira Süleymanovanın fəaliyyətini müsbət qiymətləndirsə də, gənc namizədlərin özünü sınaması üçün onlara meydan verilməsini mümkün sayıb.

Müzakirələrə komitə sədri Rəbiyyət Aslanova yekun vurub. R. Aslanova gənclərə şərait yaradılmasını, onların namizədliyinin parlamentə təqdim edilməsini yüksək qiymətləndirdiyini deyib: “Gənclərə özlərini göstərmək üçün yol verməliyik”.

R. Aslanova bir neçə gün sonra parlamentdə Ombudsmanın illik məruzəsinin dinlənəcəyini xatırladaraq, hesabatı təqdim edəcək şəxsin diqqətinə bəzi məsələləri çatdırıb: “Mən deyə bilmərəm hesabatı bizə bu namizədlərdən kim təqdim edəcək. Ancaq istəyirəm ki, builki məruzə konkret hazırlansın. Bu məruzədə məmur qorxusu olmasın, konkret adlar açıqlansın, kimlərin yol verdiyi qanun pozuntusuna görə cəzalandırıldığı açıq şəkildə yazılsın. Bir sözlə bu icmal kifayət qədər ciddi olsun” .

Qeyd edək ki, parlamentin martın 5-də keçiriləcək iclasında İnsan hüquqları üzrə Müvəkkil vəzifəsinə üç namizəddən biri seçiləcək. Dövlət başçısı tərəfindən Milli Məclisə təqdim olunan namizədlər hazırkı müvəkkil Elmira Süleymanova, Ədliyyə Nazirliyinin İnsan Hüquqları və İctimaiyyətlə Əlaqələr İdarəsinin rəisi Faiq Qurbanov və BMT-nin İnsan Hüquqları üzrə Ali Komissarlığının Azərbaycandakı təmsilçisi Teymur Məlikaslanovdur.

Hökumət mart ayında Milli Məclisdə hesabat verəcək.

Milli Məclisdən verilən məlumata görə, qanunvericiliyə əsasən yaz sessiyasının beşinci iclasında Nazirlər Kabinetinin hesabatı təqdim olunacaq.
Hesabatda hökumət üzvləri 2009-cu ilin yekunları ilə bağlı məlumat verəcək, millət vəkillərinin suallarını cavablandıracaqlar.

Milli Məclisin Sosial siyasət komitəsi tərəfindən «Ailə həkimi haqqında» qanun layihəsi hazırlanır.

Bu barədə Sosial siyasət komitəsinin sədr müavini Musa Quliyev məlumat verib.

M.Quliyev bildirib ki, bu qanunun məqsədi əsasən ucqar yerlərdə yaşayan insanların sağlamlığına diqqəti daha da artırmaqdır.

Onun sözlərinə görə, dünya ölkələrində də belə təcrübə mövcuddur.

Milli Məclis tərəfindən ümumilikdə səhiyyə ilə bağlı 20-ə qədər qanun qəbul olunduğunu xatırladan komitə sədrinin müavini vurğulayıb ki, «Ailə həkimi haqqında» qanunun hazırlanıb qəbul edilməsi də sosial sifarişdir.

Müsavat Partiyası Demokratiya Uğrunda İttifaqın bu il Azərbaycanda keçiriləcək parlament seçkiləri ilə bağlı məsləhətləşmə aparmaq barədə təklifini qəbul edib.

Partiyanın mətbuat xidmətindən APA-ya daxil olan xəbərə görə, Müsavat Divanının fevralın 15-də keçirilən iclasında ittifaqın təklifi müzakirəyə çıxarılıb. Partiya rəhbərliyi bu müzakirələrdə iştirak etmək qərarı verib.

İclasda partiyanın Mərkəzi İcra Aparatının rəhbəri Arif Hacılının rayon təşkilatlarının vəziyyətinə dair məlumatı da dinlənilib. Məlumat partiyanın parlament seçkilərinə hazırlığı kontekstində dəyərləndirilib və konkret tapşırıqlar verilib.

Yeddi nəfər əlavə və dəyişikliklərin əleyhinə səs verib

Milli Məclisin bugünki plenar iclasında “KİV-in fəaliyyəti haqqında” qanuna, habelə “İnformasiya azadlığı haqqında”, “Əməliyyat-axtarış fəaliyyəti haqqında”, “İnformasiya əldə etmək azadlğı haqqında” qanunlara düzəlişlər layihəsinin müzakirəsi keçirilib.

Konkret şəxsin xəbəri olmadan onun audio, video və fotoçəkilişi ilə bağlı məhdudiyyətlər haqqında bəndin müzakirəsi mübahisələrə səbəb olub.

Qanun layihəsinə düzəlişləri parlamentin insan hüquqları komitəsinin sədri Rəbiyyət Aslanova təqdim edib. O, Avropa Konvensiyasının 10-cu maddəsinə, habelə Beynəlxalq Jurnalistlər Federasiyasının 1986-cı ildə qəbul edilmiş sənədinə və başqa sənədlərə istinad edib.

Onun ardınca çıxış edən deputat Pənah Hüseyn bu dəyişiklikləri kəskin tənqidə məruz qoyub. O hesab edir ki, bu düzəlişlər konkret olaraq jurnalistlərin fəaliyyətinin məhdudlaşdırılmasına yönəlib.

Deputat İqbal Ağazadə düzəlişləri daha sərt tənqid edib. O, nəzəri çıxarışlarla yanaşı, konkret misallar gətirib. “Belə ki, jurnalistlər parlamentdə deputatların çıxışlarını onların icazəsi olmadan yazır, sonradan isə bu çıxışlar KİV-də yayılır. Düzəliş qəbul edilsə, hər kəs məhkəməyə müraciət edə və bütün jurnalistləri bir-bir həbs etdirə bilər”, deyə Ağazadə qeyd edib. O, deputatları nə etdiklərini ciddi düşünməyə çağırıb.

Ağazadənin çıxışından sonra vitse-spiker Ziyafət Əsgərov izahatla çıxış edib. Onun sözlərinə görə, söhbət konkret olaraq şəxsin özəl, ailə həyatına aid çəkilişlərin ondan icazəsiz aparılmasının qadağan edilməsindən gedir. İctimai əməllərə və ictimai şəxsin fəaliyyətinə gəlincə, icazəsiz çəkmək və yazmaq olar. Ziyafət Əsgərov öz çıxışında bu dəqiqləşdirmənin, yəni, özəl və ailə həyatından söhbət getməsinin düzəlişlərdə əksini tapmasında israr edib. Bundan başqa, vitse-spiker qeyd edib ki, bu məqam Konstitusiyada da təsbit olunub və burada aydın olmayan heç nə yoxdur.

Müzakirələrdən sonra qanunlara təklif edilən əlavə və dəyişikliklər yeddi nəfər əleyhinə olmaqla qəbul edilib.

Qeyd edək ki, “KİV haqqında” qanunun 60-cı maddəsinə aşağıdakı düzəliş təklif olunur: “Əməliyyat-axtarış tədbirləri istisna olmaqla, heç kim razılığı olmadan və etirazına baxmayaraq KİV nümayəndələri tərəfindən izlənilə, video və fotoçəkilişə və səsinin yazılmasına məruz qala bilməz”. Bu dəyişiklik bütün digər sadalanan qanunlara da ediləcək.

Bu sənəd parlamentin hüquq siyasəti və dövlət quruculuğu və insan hüquqları komitələri tərəfindən təqdir edilib və Milli Məclisin 12 fevral tarixli iclasının gündəliyinə daxil edilib.

KİV nümayəndələrinin peşə fəaliyyəti yenidən Milli Məclisdə müzakirəyə çıxarılacaq

Jurnalistlərin peşə fəaliyyəti yenidən Milli Məclisdə müzakirəyə çıxarılacaq.

Parlamentarilər bununla bağlı bəzi qanunvericilik aktlarına əlavələr etmək istəyir. Görəsən, yeni dəyişikliklər kütləvi informasiya vasitələri nümayəndələrinin informasiya əldə etmək hüququnu məhdudlaşdıracaq ya yox?

Öncə onu deyək ki, əlavələr “Məlumat azadlığı”, “Əməliyyat-axtarış fəaliyyəti”, “İnformasiya əldə etmək”, “Kəşfiyyat və əks- kəşfiyyat fəaliyyəti” və “Kütləvi informasiya vasitələri haqqında” qanunlara edilir.

Qeyd edək ki, əlavələr şəxsin razılığı və xəbəri olmadan jurnalistlərin foto, video çəkilişlərinin qadağan olunmasını nəzərdə tutur. Əlavələrə artıq Milli Məclisin insan hüquqları və hüquq siyasəti, dövlət quruculuğu komitələrində baxılıb və sənədin parlamentin plenar iclasına çıxarılması tövsiyə olunub.

İnsan hüquqları komitəsinin üzvü Fazil Mustafa bu cür qadağaların qoyulmasını ölkənin demokratik inkişafına mənfi təsir göstərəcək bir hal kimi qiymətləndirir. Komitə üzvü bu qənaətdədir ki, qanunlara əlavələrin edilməsi zərurəti insan haqlarının mahiyyətinin bir qədər fərqli anlaşılmasından irəli gəlir:

“Demək olar ki, artıq mətbuatın işləməsinə, videogörüntülər götürməsinə və başqa məsələlərdə bütöv şəkildə bu cür məhdudiyyətlərin qoyulması şəffaflığı ortadan qaldıracaq. Bütövlükdə mətbuatın daha sərbəst işləməsinə şərait yaratmaq lazımdır. Harada ki, böhtan var, şantaj var, təhqir var, bu Cinayət Məcəlləsində əks olunub, Mülki Məcəllədə əksini tapıb və qanunvericiliklə bunun qarşısı alına bilər. Amma harada ki, normal informasiya vermək məqsədilə müəyyən addımlar atılırsa, buna qadağaların qoyulması hər halda müsbət nəticələr verməyəcək”.

Əlavələrin müzakirə olunduğu hüquq siyasəti və dövlət quruculuğu komitəsinin sədri Əli Hüseynov isə sənəddə mahiyyət baxımından heç bir yeniliyin olmadığını deyib. Onun sözlərinə görə, əlavələr sadəcə olaraq Konstitusiyaya ötən il referendum zamanı edilmiş əlavə və dəyişikliklərin müvafiq qanuvericilik aktlarına tətbiqidir:

“Əlavə bizim konstitusiyaya sonuncu etdiymiz əlavə və dəyişikliklərdən irəli gəlir. Daha doğrusu, konstitusiyanın 32-ci maddəsinin 3-cü hissəsinə elədiymiz əlavədən. Söhbət şəxsin öz razılığı olmadan onun haqqında foto, video çəkilişin, izlənməsinin yolverilməzliyi ilə bağlıdır. Artıq qüvvədə olan konstitusiyanın tərkib hissəsi kimi olan bu əlavə tətbiq zamanı daha mükəmməl olsun, praktikada hər hansı problem yaratmasın deyə, digər bir tərəfdən də qanunvericiliyin dəqiqləşdirilməsi baxımından, mövcud olan qanunlara köçürülür”.

Komitə sədri əlavələrin kütləvi informasiya vasitələri nümayəndələrinin informasiya əldə etmək hüququnu heç bir halda məhdudlaşdırmadığını vurğulayıb. Onun sözlərinə görə, əksinə bu əlavələr məlumat azadlığını daha da təkmilləşdirir. Hüseynov onu da qeyd edib ki, əlavələr ictimai əhəmiyyət kəsb edən şəxslərə şamil edilmir.

“Burada məhdudiyyətin çərçivəsi çox dardır. Buna baxmayaraq ictimai əhəmiyyət kəsb edən şəxslərin də şəxsi və ailə həyatı sirri toxunulmazlığı qorunmalıdır. Məlumatlar verilərkən burada ədalətli balans gözlənilməlidir. Yəni şəxsi ev, ailə həyatı, ictimai, ümumi bir maraq kəsb edən bir məlumatdırsa, onda onun açıqlanması üçün müəyyən bir hüquqi baza yaranır”, – deyə o bildirib.

Qeyd edək ki, əlavə və dəyişikliklər parlamentin fevralın 12-də keçiriləcək plenar iclasında müzakirəyə çıxarılacaq.

Bahar Muradova deyir ki, yeni MSK son seçkilərin nəticələrinə uyğun formalaşdırılmalıdır

Milli Məclis sədrinin müavini Bahar Muradova bir qrup jurnalistin suallarına cavab verib.

Vitse-spikerə ünvanlanan suallar isə bu il parlamentə keçiriləcək seçkilər, seçki islahatlarının aparılıb-aparılmaması  və digər məsələlərlə bağlı olub.

- Bahar xanım, parlament Seçki Məcəlləsində dəyişiklik etmək niyyəti varmı? Xüsusilə, seçki komissiyalarının paritet əsaslarla formalaşdırılması məsələsi ilə bağlı bir sıra beynəlxalq təkliflər var.

- Bilirsiniz, paritetlik bərabər qüvvələr arasında ola bilər. Bu sözün özü də onu ifadə edir. Ona görə Azərbaycandakı seçkilərin nəticələrinə görə, paritetlik hansı qüvvələrlə ola bilər, bu məsələ açıq qalır. Hər kəsin nəyə malik olduğu artıq ortadadır və elə ona uyğun da seçki komissiyaları, onların formatı  müəyyənləşdirilib. Düşünürəm ki, bu format yalnız növbəti seçkilərdən sonra hansısa dəyişiklliklərə uğraya bilər. Hazırda isə bu format ən uyğun və düzgün bir formatdır.

- YAP budəfəki parlament seçkilərində yerlərin necə faizinə idda edir?

- Bunu bəribaşdan demək bir qədər çətindir və tezdir. Ancaq bununla belə, biz hər zaman olduğu kimi, bu dəfə də qələbəyə iddialıyıq və çox güman ki, bu qələbəni, bu çoxluğu da əldə edəcəyik. Amma bu nə qədər olacaq, bunu səsvermənin nəticəsi müəyyən edəcək.

- «Eks-prezidentlərin statusu haqqında» qanun layihəsinin yaxın zamanlarda  parlament müzakirələrinə çıxarılacağı haqda məlumatlar dolaşır. Hətta bu yöndə hakim partiyanın müvafiq layihəsinin də olduğu bildirilir. Bu, nədərəcədə doğrudur?

- Biz sonuncu dəfə 2009-cu ilin martında referendum yoluyla Konstitusiyaya müəyyən dəyişikliklər etmişik və bu baxımdan, bu dəyişikliklər Azərbaycan qanunvericiliyində də öz əksini tapmalıdır. Bildiyiniz kimi də bugünlərdə kütləvi informasiya vasitələri ilə bağlı Konstitusiyaya edilmiş dəyişiklikləri müvafiq qanunvericiliyimizə daxil etməyi nəzərdə tuturuq. Odur ki, bu proses davamlıdır və davam edəcək. Yəqin ki, adını çəkdiyiniz qanun layihəsi də qarşıdakı dövrdə haçansa müzakirəyə çıxarılacaq və ya çıxarıla bilər.

- Bu qanun layihəsi, ümumiyyətlə, parlamentə daxil olubmu?

- Bilirsiniz, ən müxtəlif siyasi partiyaların nümayəndələri bu məsələni qaldırır və onların hər biri söyləyir ki, müəyyən layihələr var. Əlbəttə, çox güman ki, hər hansı bir layihə ayrılıqda müzakirəyə qəbul olunmayacaq. Ancaq ümumilikdə bütün bu fikirlər bir araya gətirilərək vahid bir qanun layihəsi şəklində ortaya çıxarılacaq.

Pərviz Həşimli

Dünən bakı və ölkənin əksər rayonları işıqsız qaldı. Metropolitenin fəaliyyti iflic vəziyyətə düşdü, on mindən artıq insan  bir saat yerin altında həyacan yaşadı.

Enerji sektorundakı bu bərbad vəziyyət Milli Məclisin üzvlərini də narahat edib. Parlamentin qarşıdakı iclasında əksər deputatlar yaranmış vəziyyətlə bağlı müzakirələrin açılmasını tələb edəcəklər.

«Bizim Yol»a açıqlamasında millət vəkili Pənah Hüseyn bildirib ki, Milli Məclisin iclasında baş verənlərlə bağlı hökumətdən izahat tələb edəcəklər: «Bakı son günlər ən ağır günlərini yaşadı. Demək olar ki, paytaxt iflic olub. Biz hələ xeyli əvvəldən deyirdik ki, hökumət qışa hazır deyil. Bu gün baş verənlərdər bir daha bizi haqlı çıxardı».

Deputatın sözlərinə görə, enerji sektoruna kifayət qədər vəsaitin ayrılmasına baxmayaraq, bu sahənin problemləri həllini tapmayıb.

Digər deputat Zahid Oruc da fevralın 9-da baş verən respublika miqyaslı enerji qəzasına görə «Azərenerji»ni günahlandırdı: «Bakı şəhərinin və ölkənin digər rayonlarının işıqsız qalması ilə nəticələnən enerji qəzası yolverilməz haldır. Ölkə rəhbərliyi tərəfindən büdcənin çəkili hissəsinin bu sahəyə yönəldilməsinə baxmayaraq, hələ də problemlər qalmaqdıdar. Hesab edirəm ki, baş vermiş bu qəza ciddi məsuliyyət yaradır. Bütün bunlara görə, məsuliyyəti adıçəkilən qurum daşıyır. Belə bir hadisə təkrarlanarsa bu onlar üşün ağır nəticələr yaradacaq.

Millət vəkili Sabir Rüstəmxanlı isə hesab edir ki, qəzaya görə, bir qurumu hədəfə almaq doğru deyil: «Belə qəzalar dünyanın hər yerində olur. Amma hesab edirəm ki, «Azərenerji» kifayyət qədər çalışmalıdır. Çünki, bu sahəyə dövlət tərəfindən ciddi dəstək var. Əgər inkişafdan danışırıqsa, o zaman gözlənilən problemləri qabaqlamalıyıq».

Bununla belə deputat Bakının yollarında yaranan vəziyyətdən narazılığını ifadə etdi: «Paytaxt yolları bərbad duruma düşdü. Mümkün idi ki, Masazırdan duz gətirib yollara səpərdilər. Bu vəziyyət də olmazdı. Amma bunu etmədilər, nəticədə bərbad durum yarandı».

MM-in mətbuat xidmətindən APA-ya verilən məlumata görə, parlamentin sədri bu cür səfərlərin münasibətlərin inkişafına müsbət təsir göstərdiyini qeyd edib.

Bildirilib ki, dövlət başçılarının görüşləri zamanı aparılan danışıqlar əlaqələrin gələcək inkişafı üçün yaxşı zəmin yaradıb.

Spiker ölkələrimiz arasında iqtisadi, mədəni, humanitar sahələrdə əməkdaşlığın daha da dərinləşməsi üçün geniş imkanlar olduğunu deyib.

O. Əsədov parlamentlər səviyyəsində əməkdaşlığın da dövlətlərarası münasibətlərin inkişafında mühüm rol oynadığını diqqətə çatdırıb.

İki il yarım öncə Azərbaycanda olduğunu qeyd edən A. Liberman nazir kimi ölkəmizə ilk dəfə səfər etdiyini vurğulayıb. O, ötən dövr ərzində Azərbaycanda gedən inkişafdan məmnun qaldığını xüsusi qeyd edib.

İsrailin xarici işlər naziri bildirib ki, ölkəsi müstəqil Azərbaycanla həyatın müxtəlif sahələrində əməkdaşlığa böyük maraq göstərir. O, əlaqələrin inkişafında Azərbaycandakı yəhudi icması və İsraildəki Azərbaycandan getmiş diasporun böyük rol oynadığını da vurğulayıb.

Qəbulda tərəfləri maraqlandıran məsələlər ətrafında fikir mübadiləsi aparılıb.